Mercurii die 9 mensis Septembris 2026

ANTIQUITAS

RELIQUIAE NAVIS ROMANAE PROPE MAZARIAM REPERTAE

Centenae amphorae adhuc in fundo maris iacent

Prope Mazariam, urbem in occidentali Siciliae litore sitam, reliquiae navis Romanae nuper in fundo maris repertae sunt. Locus quinque fere milia metrorum a litore abest, reliquiae autem ad sex et quadraginta metra sub maris superficie iacent. Archaeologi, ex iis quae adhuc explorata sunt, navem ad secundum primumve saeculum ante Christum natum referunt.

Vestigia primum animadverterunt Iacobus De Mola et Igor Bisulli, qui, dum ad certamen nationale piscandi sub aquis se exercebant, maris fundum instrumento exploratorio perlustrabant. Quod primo saxum esse videbatur, propius inspectum ingens amphorarum acervus apparuit. De Mola ad locum descendit atque rem accuratius inspexit.

Inventores nihil inde sustulerunt, sed magistratus certiores fecerunt. Postea Carabinarii Italici patrimonio culturali tuendo praepositi, una cum Siciliae magistratibus archaeologiae marinae praefectis et Carabinariis urinatoribus, locum exploraverunt.

Centenae amphorae in fundo maris visae sunt. Plurimae ad genus pertinent quod archaeologi Dressel 1A appellant. Repertae sunt etiam partes plumbeae ancorarum atque alia res plumbea. Haec omnia eo loco iacent ubi navis antiqua periisse videtur.

Amphorae huius generis extremo rei publicae Romanae aevo in usu erant. Inde a medio fere saeculo secundo ante Christum natum in Italia occidentali, praesertim a Campania usque ad Etruriam, magna copia conficiebantur. Vino ferendo plerumque inserviebant atque late per occidentales Maris Mediterranei oras exportabantur.

Genus igitur amphorarum cum aetate congruit quae navi adhuc tribuitur. Ex eo tamen solo neque unde navis solverit neque quo tenderet certo colligi potest. Amphorae enim non necessario eo portu in navem impositae erant quo fabricatae sunt, cum merces per varios portus transferri possent. Neque, quamvis huius generis amphorae vino plerumque destinatae essent, adhuc constat quid singulae huius navis amphorae continuerint.

Multum igitur ex ulteriori exploratione pendet. Ex argilla amphorarum fortasse dignosci poterit quibus in regionibus fabricatae sint; ex vestigiis materiae intus servatis, si quae supersunt, quid iis vectum sit. Situs quoque vasorum inter se diligenter describendus est, quoniam ex eo fortasse cognosci poterit qua ratione merces in navi collocatae fuerint.

Iacobus De Mola postea rettulit acervum amphorarum ad unum et viginti metra in longitudinem patere. Haec tamen mensura ab ipso inventore relata est; magistratus in primo publico nuntio dimensiones navis nondum ediderunt. Neque adhuc constat quantum ligneae carinae sub amphoris, arena limoque servatum sit.

Alexander Giuli, Italiae culturae minister, inventum inter praecipua recentiorum annorum archaeologiae marinae reperta numeravit. Magistratus tamen nullam adhuc sententiam definitivam de origine navis, itinere eius aut mercibus protulerunt. Siciliae administratio locum accuratius describere atque explorare constituit, simulque rationes parat quibus reliquiae serventur.

Situs archaeologis eo praesertim utilis esse potest quod amphorae non singillatim e mari ereptae, sed magna copia una cum aliis navis reliquiis eodem loco servatae sunt. Itaque non solum singulae res examinari possunt, sed etiam earum inter se positus, qui aliquid de ratione qua navis onerata erat indicare potest.

Plura tamen adhuc ignorantur. Nomen navis nescitur; portus unde solverit ignotus est; quo cursum tenuerit nondum constat; causa denique naufragii exploranda manet. Neque satis compertum est quantum ipsius carinae sub amphoris harenaque supersit.

Ex ulterioribus investigationibus fortasse constabit quid hae reliquiae de itineribus, mercibus atque commercio Mediterraneo extremo rei publicae Romanae aevo docere possint.

Scripsit Beniaminus Martinus

DE SEPULCRO ETRUSCO NUPER REPERTO
De Anulo Romano Aureo in Britannia Reperto
PHARAO EX HARENIS REDIT ET ARCANA SUA REVELAT
Novissima de Antiquitate
ANTIQUI MORES (X)
ANTIQUI MORES (IX)
LX reperta archaeologica in Italiam relata sunt
ANTIQUI MORES(VIII)
ANTIQUI MORES (VI)
CULTUS DEAE VESTAE VEL ΕΣΤΙΑΣ
Compteur Journalier 31 12 (09/09/2026)