Saturni die 14 mensis Novembris 2026

POLITICA

Cur Republicani tantam cladem acceperint

 

Ex comitiis intermediis partes Democraticae victrices exierunt. Simul Republicani ingentem cladem acceperunt, cum in utraque sede congressus maioritatem perdiderint. Sed clades eorum iam diu exspectabatur diversis de causis:

Ex percontationibus iam pridem videres cives Americanos , quid praeses gesserit, minime probare, qui nulla fere promissa solverit. Cum Donaldus Trump initio praesidiatus sui „aetatem auream“ praedixerit, cives interim caritate vexantur: pecunia minus valet, pretium benzini auctum est, victus sumptiosior factus est. Deinde portoria a praeside instituta negotia non solum societatum sed etiam agricolarum impediebant, qui antea praesidi favere solebant.

Accedit, ut multi cives indignentur rem familiarem praesidis ab initio praesidiatus secundi supra modum auctam esse, cum ipsi sollicitudine victus sui afficiantur. Non mirum est, quod nonnulli corruptionem suspicantur. 
 
Denique Trumpius contra spem civium minime „praesidem pacificum“ se praestitit, quem se futurum esse pollicitus est. Immo Persis bellum intulit sumptibus plane neglectis. Timendum est, ne bellum Persicum renovatur neve sumptus energiae denuo augeantur..

Trumpius autem cladem acceptam ad se ipsum pertinere negat, quia cives non pro nomine suo suffragia tulerint. Quod mirum est: nam ante comitia fautores hortatus erat, ut ita suffragia ferrent, quasi nomen suum in schedula esset.

Scripsit Lycus Austriacus - 07/11/2026 21h44


Lulam quartum Brasiliae principatum consecutum esse
DE COMITIIS IN GERMANIA HABITIS
De Bombardamentis in Iraniam
INTER SINAS ET IAPONIAM DISCORDIA GLISCIT
DE PHILIPPINIS IURIBUSQUE HUMANIS NOVO PRAESIDE REGENTE